19 марта 2024  06:06 Добро пожаловать к нам на сайт!

Религия


ПОУЧЕНИЕ ПАТРИАРХА НИКОНА СВЯЩЕННОМУ ЧИНУ И ПРИЧЕТНИКАМ


Никон, божиею милостию патриарх московский и веса Русии, сынам [сво]им архимаритам и игуменам, протопопам и всем священникам и дияконам и причетникам.


Ведомо нам учинилося, что во святых церквах небрежение велико есть и житие зазорно, и о преданных евангильских повелении и апостольских предании и святых богоносных отец седми вселенских соборов и прочих святых отец, еж должно вам хранити и не сохраняете той, яко ж божественыи Павел, уча ны, пишеть к Титу, глаголя: во еж обычати же ся всегда к благочестию, трезвению, целомудрию, благоговению и будете рече, честни, страннолюбивы, не пьяницы, не биицы, не мшелоимцы, не сварливы, но кротцы, смотреливы, независтливы, не сребролюбцы, учителцы, яко ж вселенскаго собора 19-е правило глаголет: иереи должни суть учити причет церковный и вся люди благоверию и божественым повелением; паче ж иных дней, во всякую неделю, всего причта и народа поучати благочестию словесы, яко ж предречеся от божественаго писания, избирающем истинная разумения ж и судбы, и не преступати еж положения пределы и богоносных отец предания, но точию от божественых писанеи сказывати и учити истиному разумению божиих заповедей. Аще ж кто вопросит словесе божественых писанеи, да от своего ума то сказовати, но яко ж церковнии светилницы и учители своии писании истолковашя. То бо есть благоволно, еж ведети и умети предания богоносных отец и по том разрешати вопрошаемая, да не како недоумеюще от себе разрешити, восхотят таковии истиннаго сказания далече отпадут. Не брегущих же иереов, ни учащих причетников, ни людей благоверию 58-е апостольское правило первое отлучает. Потом аще в лености пребывает от сана измещет. Потщитеся о презветери представите себе делателя не постыдны, правяще слово истинное ни коли ж да не станете в соборе вражду имея на кого, да непроженем утешителя в день собора молвы не творити и не препираитеся, но в церкви пребывая молитеся и почитайте книги святыя до часа, вонь ж подобает вам совершити божественую службу, и тако предстаните со умилением и чистым сердцем святому жертвенику не озираяся семо и овамо, но в страсе и трепете предстояще небесному царю ничим же мнее небеснаго предстояния, да не угодия ради человеческаго подщитеся скратити молитвы, не приимите ж лица человеча, но взирающе ко единому царю и предстоящим окрест его силам достойны себе творити священным правилом, и их же отрекоша с теми не служите жи, блюдите кому предстоите и кому служите и которым даете причащения не забывайте владычни заповедей и святых его апостол, не дадите бо рече святых псом, и бисера не мещите пред свиниями. Блюдите пес и яж по сих смотрите, да не убоитеся человече на грех себе не дадите сына Божия в руки недостойным, не устыдитеся никого ж от славных земли в час той ни самого того носящого венец причащения ж достойным подавайте, яко ж и вы сами прияли есте им же божественая правила не повелевают не подавайте, яко иноязычницы бо именишася и аще не обратятся, горе и тем и причащающим их блюдите аз и о сем дела не имам вы узрите також де иж, аще кто от вас причащаяи люди пречистым и животворящим тайнам, и аще бо просит медницы, таковыи извержется по 23-му правилу шестаго вселенскаго собору.
Також де аще который презвитер, или дьякон, или полдьякон, или чтец, или певец в четыредесят дней сии речь в Великий пост не постится и во вся лета во всякие среды и пятки да извержен будет по 69-му правилу святых апостол.
Аще ж мирскии человек не постится, да отлучится, или аще кто преданыя посты хранимыя церковию, разреша таковыи проклят есть по 18 правилу иж в Гангрех собора, а от престола к нему ж кто благословен есть и у него ж кто служите начнет преходити никако ж власть не имать по 3-му правилу иж во Антиохии и двема церквама да никто ж владеет по 15 правилу седмаго вселенскаго собора да не святая корчемствовати от вас явитца, но кииждо единому и тому ж до престолу да предстоит в церкви свободою изобилующей, а в церкви куплею стяжанеи рекше не у купленого места ея ж ради извержению предает. Той ж вселенский собор по 13-му правилу, или аще кто от вас лихву взяв от должника да извержется по 44-му правилу святых апостол.
Ведомо ж нам и се, что во святые посты поклоны творять не по церковному преданию, еж есть метание с великими не разлучают, овии поклонився единою на землю и тако невсклоняся множицею крестится, да точию головою кивает, а инии на скамейки, и о том бы вам самем испытноведати, что метание и что суть великие поклоны метание суть: в пояс поклонитися как мощи до земли рукою достать, а великий поклон в землю челом ударить. И от ныне клали бы есте сами поклоны и прочим повелевали по уставу святые восточные церкви и по благословению нашего смирения вси вкупе равно тихо. Егда полагаются седмь на десять поклонов по сущую Богородицу поклон земныи и прочих три великие в землю с молитвою «Господи владыко животу моему», к сем ж два на десять метания в пояс, и последний великий ж поклон в землю. Тако и святыи Боже и на приидите поклонимся. Поясные ж поклоны клали со всяким благочинием немятежно, аще ли ж кто от вас о сем завещании не брещи имать или чесого неподобающаго священства кто от вас начнет деяти еж чрез заповедь святых апостол и богоносных отец и нашего благословения, яж выше рекохом, таковым будет суд без милости от нас по правилом святых апостол и богоносных отец, тако ж аще кто и мирскии человекъ прекослов и нерадив явится о преданных заповедех христовых и святыхъ апостол, и святыхъ отец, и вам бы им запрещать по правиломъ святых апостол и святых отец.
А аще кто зело явится прекословен, и вам бы возвещать нам великому государю святейшему Никону, патриарху московскому и веса Русии. А аще ли ж таковым сам не запретит и нам не возвестит, таковыи о всяким неисправлении сам ответ даст в день праведнаго суда Христова. А я ж зде правилным судом от нас истязай немилостив будет.
Сего ради, братие, завещанным внимайте да ж сохраняюще заповеди божия и предания святых апостол и святых богоносных отец злобы избывше с правдою поживем.
О Христе Исусе Господе нашем, ему ж слава со безначалным его отцем и со пресвятым и благим и животворящим духом ныне и присно и во веки веков.
Аминь.

Февраль 1654 г.

Rado Laukar OÜ Solutions